“Feel the Beat”, projekti që mundëson ndijimin e muzikës për të rinjtë që nuk dëgjojnë

Ka nisur këto ditë në Tiranë projekti më i veçantë dedikuar personave që nuk dëgjojnë. Për të rinjtë që nuk dëgjojnë, ashtu si të rinjtë që dëgjojnë, pjesëmarrja në aktivitete muzikore ndikon në përmirësimin e shëndetit mendor të tyre. “Muzika është gjuha universale e njerëzimit”, thotë një thënie dhe sipas H. K. Andersen “aty ku fjalët dështojnë, muzika flet”.

Projekti “Feel the Beat” që përmes disa pajisjeve specifike dhe metodave të dedikuara ka nisur tashmë aktivitetet që u mundësojnë të rinjve që nuk dëgjojnë të arrijnë të perceptojnë muzikën përmes vibracioneve të tingullit. Synimi i këtij projekti është që përmes perceptimit të tingullit dhe muzikës të mund t’i ndihmojë të rinjtë pjesëmarrës në aktivitet që të rrisin besimin e tyre. Muzika inkurajon të mësuarit rreth emocioneve dhe ndihmon në zhvillimin e aftësive të shkëlqyera motorike.

Datë 13 tetor 2022 u zhvillua sesioni i parë i edukimit dhe trajnimit muzikor për të rinjtë që ndjekin shkollën e mesme të Institutit të Fëmijëve që nuk Dëgjojnë. Djem dhe vajza të këtij institucioni morën pjesë individualisht dhe në grup duke luajtur muzikë vetë dhe duke “dëgjuar” ritmin përmes vibrimeve të muzikës nga instrumenteve të pranishme.

Ky projekt zbatohet nga organizata AMAD dhe mbështetet nga Kongresi Rinor Kombëtar, në kuadër të Tirana Kryeqyteti Evropian i Rinisë 2022. Pas komunikimit me koordinatoren zbatuese të projektit, na konfirmuan se aktiviteti vijues i edukimit ritmik “Të prekim tingujt”, do të zhvillohet në mjediset e Institutit të sipërpërmendur, por këtë herë përmes një teknike të re. Qasja e “Feel the Beat” është t’u krijojë këtyre të rinjve mundësinë dhe përvojën e ndijimit dhe shijimit të muzikës, duke kapërcyer barrierat fizike.

Burimet nga AMAD shprehen se kulmimi i projektit do të jetë në realizimin e pesë minikoncerteve në lokale në Tiranë, ku luhet muzikë live. Këta të rinj do t’u bashkohen të rinjve të tjerë të grup-moshës së tyre, për të shijuar të gjithë së bashku muzikën përmes gjuhës së tingujve.

Tirana është qyteti i një mijë e një mundësive për këdo që ka vullnetin, energjinë, por edhe mendjen krijuese.